|
Eg varð fødd tann 25. september í 1966 í Tårnby Prestagarði á
Amager. Mamma mín, Guðrið Helmsdal, sum er úr Havn, er yrkjari, og pápi
mín, Ole Jakob Nielsen, sum er uppvaksin á Borholm, er trælistamaður.
Lítlibeiggi mín eitur Gudmund Helmsdal Nielsen, og býr í løtuni í
Keypmannahavn og lesur kinesiskt og miðlavísind.
Eg eigi tvey børn, sonur mín (f. 1994) eitur Gwenaël Akira
Helmsdal Carré, og mín lítla dóttir (f. 2002) eitur Felisia Jógvansdóttir
Helmsdal.
Eg havi búð meginpartin av lívinum í Føroyum, og mest í Havn. Nøkur
ár búði eg tó í Leynum, har foreldur míni enn búgva. Búði
eisini í Fraklandi í 5 ár, í Brosses, eini lítlari bygd í
Bourgogne. Har skrivaði eg mínar 4 fyrstu bøkur.
Nú búgvi eg so í Havn, úti á Reyni í Skipara Hansenshúsið, og
her ætlið eg mær at vera búgvandi, (um eg altso ikki flyti til Port
Janua........)
Tað er ikki tað stóra eg havi av útbúgving, bara studentsprógv,
men eg havi gjørt eina rúgvu av øðrum áhugaverdum. Eg havi arbeitt
á bókasøvnum, skrivstovum og laboratorium og sum urtagarðskvinna, og
ritstjóri á einum web-tíðarritið.
Nú arbeiði eg á Jarðfrøðisavninum, har eg taki mær av bókasavninum
og heimasíðuni hjá Jarðfrøðisavninum
og henni hjá SINDRA, og undirvísi
í kreativari skriving á kvøldskúlanum. Havi eisini fingist heilt
fitt við barna- og ungdómsmentan tey seinastu árini, havi undirvíst
í drama, skrivað og sett upp leikir saman við ungdómum, eri
projektleiðari á ungdómsmentanarstevnuni "Ung í Føroyum",
og havi ferðast við Hedvig Westerlund, sjónleikara, á søgusigaraferðum
í Føroyum og Finlandi. Havi altíð verið nóg uppi í sjónleiki,
seinast sum framleiðslustjóri av Álvaleiki hjá Havnar Sjónleikarfelag.
Annars taki eg mær eisini av heimasíðuni hjá Grímu.
Fyrsta rættiliga stuttsøgan hjá mær kom út í Brá í 1986. Hon æt
Skerdu vit veingir tínar, Ikaros? (Hon er seinni endurprentað
í Slóðum hjá Skúlabókagrunninum, og í broyttari útgávu aftur í
Søgum úr Port Janua.)
Annars eru tey týdningarmiklastu tingini, eg havi á prenti, hesi:
Stuttsøgur
- “Firvaldaseljarin”,
stuttsøga (Brá 1989 og Søgur úr Port Janua, BFL, 1996)
- “Dýpið”,
stuttsøga (Brá 1989 og umsett til norskt í Fysta ferda bort,
Samlaget, 1993)
- “Ferðandi
í tíð og rúmd”, ferðahugleiðing (Varðin 52)
- “Delirium
symphonica”, yrking (Brá 1993)
- “Glámlýsi
og mánalátur”, stuttsøga (Birting 1995, og Søgur úr Port
Janua, BFL, 1996)
- “Argantael”,
stuttsøga (Ein varligur dráttur í tara, MFS, 1995)
- “Køksgluggin”,
stuttsøga (Barnablaðið nov. & des. 1993, myndir Edward Fuglø,
og í Drekar og annað valafólk, BFL, 1998)
- “Apríl”,
stuttsøga (Søgur úr Port Janua, BFL, 1995, og Heiðin hind, Skúlabókagrunnurin,
1999)
- “Angi
av ribes”, stuttsøga (Mjørki í heilum, BFL, 2001)
Bøkur
- “Tey
kalla meg bara Hugo”, barnabók, BFL 1995, BFL 2003
- “Søgur
úr Port Janua”, stuttsøgusavn og sjónleikur, BFL 1996
- “Hvørjum
flenna likkurnar at, Hugo?”, barnabók, BFL 1997
- “Drekar
og annað valafólk”, ævintýrbók, BFL 1998, myndir Edward Fuglø
- “Kom
yvirum, Hugo!”, barnabók, BFL 2003
Sjónleikir
- “Brúsajøkul”,
dramatisering av søgum hjá J.P. Heinesen, barnaleikur, leiktur
fyrstu ferð í 1988
- “Nær
kemur kavin?”, skrivaður saman við leikbólkinum Caratula,
barnaleikur, leiktur í 1988
- “Ævinliga
árið”, skrivaður saman við leikbólkinum Caratula, barnaleikur,
leiktur í 1989
- “Kvarnareygað
purpurreyða”, 1990, prentaður í Søgum úr Port Janua, ikki
leiktur
- “5
violettir flugusoppar”, skrivaður við næmingum á kvøldskúlaskeiði,
barna-og ungdómsleikur, leiktur 1997
- “Tá mánin
setur og sólin rísur”, skrivaður við næmingum á kvøldskúlaskeiði,
ævintýrleikur, leiktur fyrstu ferð í 1998
- “Vitavørðurin”,
bílagdur og leiktur av Grímu í 1999
Hyggið annars á heimasíðu mína www.rakelhelmsdal.com
eftir fleiri upplýsningum um tekstir mínar, Port Janua, og eisini nøkrum
heilum tekstum.
Tilskrift
Skipara Hansensgøta 6
FO-100 Tórshavn
Tlf: 316596/216596
Teldupostur: ici@kallnet.fo
|
