Føddur 12. september 1941 í Keypmannahavn. Foreldur:
Karsten Hoydal og Marie Louise Hoydal, fødd Falk-Rønne. Systkin: Egil,
tvíburabróðurin Kjartan og Annika.
Giftur Jette Hoydal, f. Dahl, studentaskúlalærara. Børn: Marianna,
Kristina og Dánial.
Heim í august 1945 við "M/S Aarhus", fyrsta ferðafólkaskipinum
eftir krígslok. Búði 1946 - 1950 í Klaksvík, har pápin var leiðari
á niðursjóðingarvirkinum (bollafabrikkini) hjá J. F. Kjølbro,
flutti til Havnar í 1950, barnaheim uppi á Hálsi á fløtunum har við
seyði, neytum, hønum og gæs. Gekk í bygdarskúlanum í Hoyvík,
seinni í kommunuskúlanum í Havn og síðani í millumskúlanum. Eftir
annan millumskúlaflokk flutti hann og húskið alt til Suðuramerika,
har pápin hevði starv í ST-stovninum FAO 1954 - 1957 og skuldi standa
fyri at byggja upp fiskivinnuvirki í býnum Manta við
Stillahavsstrondina í Ecuador.
Á Sorø Akademi í 1955 at ganga í skúla, fekk málsligt studentsprógv
haðani í 1960. Matematiskt prógv í 1961 og filosofikum frá lærda háskúlanum
í Keypmannahavn sama árið. Skeið í fornmálum, fornfrøði og
listasøgu sama stað, prógv í grikskum 1968.
Fór undir at lesa søgu, men stóð samstundis upptøkuroyndina til
Kunstakademiets Arkitektskole, haðani hann fekk prógv sum arkitektur
í 1967. Á ymiskum teknistovum í Keypmannahavn 1967 - 1972. Vann í
1969 norðurlendsku arkitektakappingina um gamla býin í Havn, síðani
ráðgevi hjá Tórshavnar kommunu í býarskipanarmálum. Í 1972
settur sum býararkitektur í Havn. Almenna byggisamtyktin varð góðkend
í 1972 og gjørdist støðið undir stóru útbyggingunum í 70- og 80-árunum.
Fyri verk, hann hevur staðið fyri, serliga í gamla býnum og við
randarhúsini Millum Gilja og Inni á Gøtu, fekk Tórshavnar kommuna
heiðurslønina Danske Arkitekters Æreskaleidoskop. Segði seg úr
starvinum sum býararkitektur á 25-ára degnum í 1997 fyri at kunna
vera rithøvundur og týðari buturav.
Ritstjóri á tíðarritinum Framanum í Keypmannahavn 1965 - 1969,
formaður í Mentunargrunni Studentafelagsins 1969 - 1972. Ritstjóri
Varðans 1977 - 1981. Formaður í Rithøvundafelagi Føroya 1981 -
1986, stovnari og fyrsti formaður í listafólkasambandinum LISA 1982 -
1988. Limur í Mentunargrunni Løgtingsins 1984 - 1988, formaður í Ljósritagrunninum/Fjølriti
1986 - 1994. Formaður í Arkitektafelagi Føroya 1990 - 1995. Formaður
í rithøvundafelagnum aftur síðani 1998. Formaður í stýrinum fyri
Listasavn Føroya.
Frá 1964 ummæli og frásøgnir í Varðanum og øðrum tíðarritum.
Hevur síðani skrivað yrkingar, sangir og fagrar bókmentir av ymiskum
slagi umframt yrkistekstir, serliga um føroyska list og listafólk.
Útgávur
- Myndasavn, bók um listamannin Ingolf Jacobsen á
Kamarinum, 1972
- Den gode vilje, leikur til danska sjónvarpið
1976, saman við Steinbirni B. Jacobsen
- Av longum leiðum, stuttsøgur og ferðafrásagnir,
1982
- Mit eget land, sangir 1983, saman við Anniku
Hoydal
- Hús úr ljóði, yrkingar, 1988
- Ingálvur av Reyni, listabók saman við øðrum,
1989
- Dulcinea, sangir 1990, saman við Anniku Hoydal
- Undir Suðurstjørnum, skaldsøga 1991
- Långt bortifrån, bók við úrvali av søgum, týddar
til svenskt, 1992
- Janus Kamban, listabók 1995
- Stjernerne over Andes, týðing til danskt av Undir
Suðurstjørnum, 1996
- Skeyk, sangleikur saman við øðrum, 1997
- Havið, sangir saman við Anniku Hoydal, 1999
- Dalurin Fagri, skaldsøga, 1999
- Land í sjónum, tíðartekstir, 2001
Fekk virðisløn M. A. Jacobsens í 1982. Í uppskoti
til bókmentavirðisløn norðurlandaráðsins í 1989 og 1993.
Hevur fingið virðisløn M.A.Jacobsens 1982. Uppskotin til bókmentavirðisløn norðurlandaráðsins 1989 og 1993.
Tilskrift: Traðabrekku 13, 100 Tórshavn. Tlf. 12849
|
